A Coruña, 20 de febreiro de 2025 – O Laboratorio de Investigación en Sistemas para a Transición Enerxética (LISTE–Resonac) abriu oficialmente as súas portas no Centro Interdisciplinar de Química e Bioloxía (CICA) da Universidade da Coruña (UDC). A nova instalación, parte da Cátedra Resonac–UDC Sparking Truth, foi inaugurada esta mañá polo reitor da UDC, Ricardo Cao, e polo concelleiro de Educación, Formación e Innovación Tecnolóxica do Concello da Coruña, Juan Ignacio Borrego.

Ao acto tamén asistiron Pablo Rifón, director xeral de Operacións de Resonac Graphite Spain; Jaime Rodríguez, director do CICA; así como o director e a codirectora da Cátedra, Israel Temprano e Alba Tuñas, xunto con outros membros do equipo.

Financiado por Resonac Graphite Spain, o laboratorio LISTE–Resonac impulsará o desenvolvemento e a implantación de tecnoloxías baseadas en fontes de enerxía limpa e renovable para a xeración, o almacenamento e a transformación da enerxía, e favorecerá o desenvolvemento de baterías para vehículos eléctricos mediante a investigación en materiais como o grafito, un compoñente esencial dos ánodos das baterías de vehículos eléctricos.